farewell lunch@Grappa's Cellar

今日去左公司樓下食farewell lunch，唔講真係唔知原來起樓下有一間咁寬敞的意大利餐廳。環境都幾好，原來要一早book位如果唔係都唔駛旨意可以入到去食lunch。

嘩！佢個pizza 真係好好味，第一次到咁好味的pizza，佢有必於一般pizza hut 個d 得個厚字的批底。

見到emily au 可以離開返返去澳洲昆士蘭享受人生真係開心，原來有錢真係好重要，最起碼唔須要為生活要憂慮。錢係咪重要到咁呢？其實我自己都已經分唔開錢的重要，錢無可能可以買到所有的野，最起碼快樂係用錢換唔到...

Pizza Parma~好好好味

Tiramisu-咖啡味好淡但酒味好濃，這 Tiramisu 特別帶有一股杏仁味，與平時食開的Tiramisu 的味道好唔同。

Homemade Apple Tart with Vanilla Ice-cream

托泥

自從去完旅行後返到屋企見到有幾多盤紫羅蘭枯萎後心情一直好低落，或多或少都係自己之過，一路都以為細佬會好好地照顧的的盤栽，其實好大機會係我去旅行期間香港太熱所以熱死晒佢地啦！

今日終於都比我搵到個籍口去發叔度，就係去買泥啦，因為我d 泥只係用剩好少，其實都仲可以挨多兩個月等下次換完泥再去買，但係真係好想種d靚靚花花，雖然7、8月係種紫羅蘭的高危期但都無阻我對紫羅蘭的熱愛，加上我都係打算全部帶返公司種，公司有冷氣應該無問題的，但公司現在已經有7盤啦，好在我張枱乜都無，再放多幾盤都應該ok啩？

今日去到發叔度都好晏所以個花場已經無晒參觀者，所以有好多時間向發叔請教，發叔今日又教識了更多有關種植的知識。發叔真係謙虛，發叔種了紫羅蘭幾十年，但係發叔只係話佢都仍在學習中，佢只係掌握到種植的知識約40%，而我這個只係種了一年花的新手真係好皮毛。
一去到發叔個花場就係見到隻bb 狗啦，無見幾個月bb 狗已經大隻左好多，個身型已經係一隻成年狗啦，隻狗好鬼熱情，我最驚就係狗，次次都鬼咁熱情，真係比佢嚇餐死！
發叔個花場原來係逢星期日都會淋水，所以入到去成個場都係水，我都唔理得咁多即刻揀我要的花，但今次去度發叔度又係全場無花咁濟，發叔話因為早幾日落完剎蟲劑所以d花全部都枯晒。無花睇唯有睇圖啦！上次發叔話我知種植紫羅蘭有四個品種係必種，我已經擁有了其中兩個品種，其中一個品種phoebe已經有，而我今次係想買第四個品種S704+，但發叔搵到個正開花的第四個品種比我睇，睇完我又唔係咁鐘意所以放棄左。

當我同發叔講返我上次買左盤S516+ Carnation Sprinkles返到屋企無耐佢就爛莖，發叔問我做乜唔帶返去比佢睇，其實自從我上次打過電話去問發叔點急救後盤S516+ Carnation Sprinkles以經返魂乏術，所以都無得帶返去比發叔睇。於是發叔起佢堆花度左揀右揀，揀了一盤S516+ Carnation Sprinkles出嚟，其實我已經唔想再買這個品種，我只在乎曾經擁有，既然已經買過，所以想種下其他的品種。發叔拎起了幾盤S516+最後話呢盤最健壯係阿媽嚟，送返比我，佢仲話呢盤開左花可以賣到好貴，呢盤花D 花d 葉大塊到有D嚇親，塊花的直徑有成7cm。發叔真係好送比我個盤係應該係全部S516+最大盤的一盤啦，希望佢可以快D 開花啦！

之後發叔拎左幾張圖比我揀花，再介紹左盤286+比我，佢話呢盤開左好靚，通常十字花都係好貴，發叔知我係愛花之人，佢話呢盤唔買得苗，貴少少比多d 錢買盤就開花家啦，既然發叔咁講我當然好樂意接受啦，反正都係想買一盤係粉紅色的花。

睇睇下個3張圖見到盤S596+ Queen Sabrina 係重疊花瓣睇圖見佢顏色都幾靚加上我自己係無重疊花瓣的品種所以就帶埋盤S596+ Queen Sabrina 返屋企。發叔話這盤花係單、雙瓣，咩係單、雙瓣？發叔話盤花開得唔係咁隱定，有時會開單瓣有時會開雙瓣。

因為發叔個花場今日安裝緊個水泵所以同我傾傾下就會走左去監住安裝。花就揀完啦，又係時候問下發叔平時的種花遇到的問題。
發叔個花場好犀利家24小時冷氣開放，仲要係keep 住起21度。

大鄉里真係大鄉里，今日先至知原來蚊係有兩種一種係會咬人，而另外一種係會咬花，發叔話紫羅蘭的葉係甜的，所以會有蚊咬佢D 葉，佢仲拎起了一個花比我睇。
發叔話原來要D盤栽開花係一係好容易的事，只要係一粒避孕丸磨碎係再開水淋花，咁D盤栽就係於兩個星期開花，但係問題係會令到盤花係咁開開到盤花會自己死亡。
成日起form 見d 人問自己盤花係咪有蟎蟲及棉花蟲，今日終於都問左發叔啦。蟎蟲係紅色一粒粒，而蟎蟲是會傳播，如果其中一盤花有蟎蟲咁就會好傳染比其他的盤栽，蟎蟲係一盤的農藥係唔能夠消滅，所以盤花如果生了蟎蟲最好的方法係丟左去。室內空氣不流通，加上泥土太潮濕亦可令紫羅蘭容易滋生蟎蟲--->咁好似好危險喎。
至於棉花蟲又係d乜，發叔話棉花蟲比起蟎蟲仲犀利，一盤中其餘都會全中，發叔話棉花蟲會飛的，所以好易傳播開去。發叔棉花蟲好多時都會起龍眼度見到，乜原來平時起龍眼個殼上面個d就係棉花蟲佢唔講我都唔知。
最後唔知講開d 乜，我話比發叔知我D 花平時係放起露台 (我唸住空氣流通)，但發叔話千祈唔好咁做，因為好容易將街外的病菌帶到去我的盤栽到，同時街上的樹最多蟲之類的動物，都會好易飛到去我的盤栽到；而且朝早太陽伯伯爬出來的時候會曬死D 花。
同發叔傾到差不多7點又係時候去食飯，帶走三盤花及一包泥($20)，發叔只係收左我$200，今次係買咁多花最平的一次！發叔收錢時仲話盤S516+無收你錢，你比心機D種，下次再種死無得再送返比我。發叔我會比心機種，因為佢都有生命，我好珍惜佢地小小的生命，同埋都想見到佢地開花家....包泥好重拎住佢真係好似擔泥咁...
本來仲想帶埋S712+返屋企，佢開出來朵花真係好靚，好鐘意呀！但係夏天這個高危期真係唔敢搞買咁多住，一陣熱死佢地我又心痛，發叔叫我冬天先至再去買，咁都係一個好建議，所以我影抵左佢個no.留待下次再去接佢地回家。

發叔話呢盤係十字葉，好特別而售價都幾貴$600，我自己就唔識欣賞啦，佢開ge 花同我盤$8紫羅蘭的顏色係一模一樣，只係d 葉比較特別，我自己係賞花並非葉，所以睇下影低張相做個回憶就算啦！

團購

近來流行團購，但係睇嚟睇去都好似無乜野啱我用，所以一直都無用過這類型的服務，今日上網時無意中見到有subway coupon 團購，只要用$25就可以買到價值$50的coupon，足足慳了50%，但係使用條款唯一一個最唔好的地方就是一開始所選定的地點是不能更改，自己知自己鐘意轉工所以買的時候都唸左好耐買幾多張好，最後為了安全起見只係買了10張，起中環返左咁耐工都係食過幾次subway，所以買得太多實在係太高風險的投資。

原來團購這些coupon 都幾方便，只要用信用咭付款完成後，就會有mail 通知，再上去download 返d coupon 就可以使用，方便度100%，既不用郵寄、又不用親自領取，快捷方便！

枯萎的紫羅蘭

有d 野真係唔可以假手於人，本來我個19盤紫羅蘭好地地，於我放過期間交托了細佬幫我好好地照顧佢地，佢只係按我指示淋水了事。長假期後回家一看，大部份都已經枯萎，本來好地生長中，剎那間牠的生命被剝奪。

原本以為起屋企種紫羅蘭會係最安全，所以放假前將其中兩盤帶了回家，誰不知原來起公司個3盤紫羅蘭係最安全，因為水汪汪&金波囉好好地照顧我的盤栽，早知係咁我將全部都帶晒返公司啦...我擁有的紫羅蘭數目急速下降，現在只餘下11盤咋，其中月兩盤急救中，睇嚟我都係要去發叔度再買返幾盤至得！

西藏手信

初時仲以為西藏這個落後的地方應該係無乜購物點，仲唸住只係可以比個萬幾蚊團費就已經可以，誰不知我個如意算盤打唔響，今次個團共去了三個購物景點，而這三個景點都係國營的商場，所以購物都有保障。

出發前老豆話如果去到西藏有D 乜係開左光叫我記得買返嚟比佢地，既然有要求咁我都要照單全做，開左光GE 會係D 乜就係天珠，我總共買了3粒老天珠，仲有證書家，唉本來唸住乜都唔買家啦，點知呢D 天珠又用左我幾千蚊，當然啦如果起香港買天珠真係超貴，仲要無我今次買到個D 咁靚，算啦當賺返個團費囉！

最後個個景點係去買藏藥，見藏藥又係好出名，加上有一D 成藥話食完一個療程後可以更治高血壓，大家都知當患上高血壓後，降血壓藥係會跟住一生一世，既然有一個藥物可以永久根治，個少少錢我都唔想慳啦，就係咁我又買左D藏藥，仲買左兩種藏藥材回家，真係估唔到個少少藥材，每包都幾貴吓，於這個景點我又買左幾千。加加埋埋我起西藏淨買都差唔多用一萬...破產啦！
唸唸下我買左咁多野應該都賺得返個團費啦...賺唔晒成個團費我估一半都賺到啩

天珠：上排個三粒天珠已經開光，亦都係最貴個三粒。店員話要一個星期後先至可以打開，仲要用陰陽水浸下粒珠先至可以戴。(因為我買完就影這張相，所以影唔到粒珠個樣，返到屋企即刻派晒比屋企人，所以都費是再問佢地拎返嚟再影相！)

於八廓街買到的小飾物及轉經筒

西藏的特產牦牛肉乾，走個時起機場見到有得買，仲平過這間國營超市。
買給自己的手信就有兩條披肩及一個假的轉經筒，這個轉經筒係比較貴的一個RMB15，起無意中比我發現完來個轉經筒頭頂有一張藏文的經書，雖然係假的但係都幾有特色！

這兩條披肩係我堅持要買比自己的，雖然又唔係好靚，但係點都想買返小小野比自己作為一個紀念品。

西藏之旅~使費

都係時候計一計今次西藏之旅總共用了多少錢，作為一個紀錄又好或者係將來planning 去第二度玩做一個預算都好！今次個團費本身都好貴，加埋我請左6日no pay leave 真係超貴，但係都物有所值的，最少我都感受到造物主的奇妙作為，又可以親身經歷到風光如畫的神秘西藏。

	HKD	RMB
團費	13,399.00
稅、燃油附加費	1,139.00
保險-平安保險	450.00
保險-藍十字	395.10
導遊費	540.00
額外導遊費	60.00	200.00
搬行李費	-	30.00
車厘茄	-	3.50
天珠	-	3,280.00
披肩	-	160.00
牦牛肉乾	-	283.00
藏藥	-	1,140.00
米蔘	-	500.00
手掌蔘	-	700.00
舞台劇-幸福路上	-	280.00
八廓街手信	-	36.00
洗手間	-	10.00
Total	15,983.10	6,622.50

回家

經過9天的旅程終於都要回家，老人家常言道“在家千日好”，又真係幾又道理，起碼屋企張床又好瞓d 又乾淨d 先啦！

我今日係選擇了搭機鐵去九龍站再轉的士，車費與出發當日係相同。

一落機我就收到ar 姐send 左3個message 比我，其實我都只係一個小職員，我從來都唔覺得自己起公司有存在價值，但真係估唔到起短短的9日公司發生了這麼多的事情乜我起公司個位置真係咁重要咩我落機後連忙覆返ar 姐個message 希望大家同事都能開開心心一起工作。事情總會過去的，既然大家咁掛住我，我會唯有明天準時d 返公司比大家見到我啦！

搭搭下的士天突然間下著大雨，真係激死我啦，落雨仲要我拖住個喼返屋企真係超辛苦囉。

去左咁多日旅行我係完全唔記得仲家中的十幾盤紫羅蘭。到我返到屋企派晒手信才見到我心愛的紫羅蘭。天啊！3盤、3盤呀，仲要其中一盤係最貴係盤價值$800的紫羅蘭枯左，真係激、激、激死我啦！當我見到時我即刻問細佬“係咪無好好照顧我d 花，點知佢話我幫你淋水個時已經見到佢地枯緊，我又唔識得搞佢地，你話淋水我咪淋水囉！”

西藏之旅~感想

好開心好順利完成了西藏9天之旅途，經過了這個旅途令我更加了解西藏的宗教信仰，而西藏的神秘感亦都隨著行程的而被續一揭開。

於這9天的旅程真的令我大開眼界，亦都令我感受到造物主的奇妙作為。這個短短9天的旅程令到我人生的經歷更加的豐富。

其實一直都知道去西藏會係一個好艱苦的旅途，去到西藏這個高原地方真的很害怕會出現高原反應而返回天家，神的恩典真的夠我用，我只係於第一天抵達海拔5,000多米的色季拉山口出現了少少的高原反應，及後得到充份的休息後高原反應已經痊癒。

色季拉山口
很感恩我可以於整個旅程經歷到落雹、落雪及於海拔5,000多米的高原看見雨後的彩虹多達三次。這些美麗的回憶真的叫我讚嘆不絕。而我們的旅途每次都係下車拍照時天氣放晴、陽光普照，當上車後駛往下一個景點，天氣就轉差下雨。

雨後彩虹

落雹
因為今次的旅程只是獨個兒出發，但亦都是一個不可多得的回憶。因為我好怕凍所以帶了很多的冬天衣服出發，個喼出發時已經超重，今日細佬請左半日假唸住幫我拖個喼去機場，但係呈強的我當然係唔駛佢啦！

臨走時交代好所有野之後我叫細佬乖乖地，點知細佬答我你講到你自己好似一定會死咁 (邊個知去到會發生咩事喎，交代清楚好D嘛)。最後我出門口時細佬同我講小心D呀！

由屋企開始要自己拖個喼去機場已經非常之吃力，到了香港機場去寄行李亦都係一大的考驗，以我的體力真的不能將這件超重的行李抬到行李帶上，我出盡全身的氣力好不容易才能將行李放上行李帶寄艙。

去到成都亦是另外一個考驗，因為我亦要獨個兒於行李帶上將自己的行李般下來。同時亦要將自己的行李抬到旅遊巴的行李箱內，當我去到成都時真的感到自己是如此般的弱。好在最後有驚無險地我都能夠處理好我的行李。好在於旅途中遇到一個好好的團友Leo，可能佢見我唔夠力之後每次佢都有幫我搬行李，但係我件行李咁重，真的好怕會令到Leo 弄傷。好在整個旅程都能夠輕輕鬆鬆地完成，感謝各位團友的扶持與幫助。

因為西藏好多山，而有些景點要行好多斜路、山澗、樓梯，原途亦要揹住件風褸或羽絨所以個背囊好重，行斜路真係行到我索晒氣，細佬見我咁辛苦幫我拎住個背囊等我行得無咁吃力，佢的行為真係我好似我細佬，雖然到離開個日都未知細佬叫咩名，但係我全程都稱呼佢做細佬！細佬真係好乖及孝順，佢同文爸爸的性格無乜所謂，所以佢地兩父子為我地的旅途增添了不少的歡樂氣氛。
短短9日的旅程真的獲益良多。今次這個旅行團只有13人，其中有5個團友都是獨個兒出發，其中有一對夫婦及一對母子相信他們的生活是比較富裕，所以對於這個艱苦的旅程亦有很多的微言，但是我們的旅途中的食宿都係當地最好，每餐都有十幾款餸菜，雖然每餐都只係得很少的肉類，但對我來說我們已經是享用到當地藏民無法每天享用到的食物，所以我覺得這個旅程真的是享受住咁去食。

我們這團真的很幸運，成團人都沒有嚴重的高原反應，真的很感恩，反而是當地的洗手間的衛生情況相當之惡劣，當每次小便時都要與惡臭及烏蠅共處，可想而知我們多麼的不想去洗手間呢！到臨走前一天文爸爸好搞笑咁講嚟西藏只係得廁所反應，無高原反應，我地個廁所反應真係好嚴重，哄得全團團友大笑。

好在今次有一個很好的導遊-小曾，她帶了我們作出了不同的賞試，因為洗手間的衛生情況太惡劣，最後我們都要唱山歌於山邊小便，我自己從來都無想過我這生會有一個這麼難忘的經歷。同時亦去了一個於別人眼裏會覺得恐怖的地方—荒廢了的天葬場，天葬於西藏係一個好神聖的葬法，真的幸運可以一睹這個地方。

最後，感謝Leo 沿途與我分享，他的見解真的令我上了一生寶貴的一課。Leo 教識我“今場波踢唔好咁就下場再努力過”人生就係咁只要努力過問心無愧就可以啦！

旅途中共拍了1,872張照片，因為旅途中有好多時間都要搭車，而風景優美的地方，往往都是於行車時出現，為了唔好錯過美麗的風景，所以有好多的相片於行車時拍下，所以有反光的情況，好在最後都知道應該如何隔住玻璃影相而影出來的效果是沒有反光。

但當我回家後再翻看照片後我才發現完來我亦有很多有紀念價值的地方沒有拍下，真的有點兒可惜，人總是這樣，機會就放於眼前，但總是會一次又一次地錯過…

西藏之旅~Day 9 - 由拉薩返回香港

愉快的旅程轉眼間又完結，雖然每日的行程都安排得密密麻麻，每日都要好早起身，但到了今日即將離開真係有點兒唔捨得。西藏都係一個風景優美的地方，空氣又清新。無論有幾唔捨得我們都要離開了。

今日morning call 時間係8:15am，因為要預多少少時間比我地pack 好自己的行李，我今日好早就自己醒左，或多或少都因為唔捨得，既然我都醒左所以早d 起身執埋d 行子，我個喼由出發開始就已經好爆滿，幾經辛苦先至可以將拉鏈拉上。到走這刻雖然我已經將好多衣服丟掉，但我由於當地買了一定份量的藏藥及牦牛肉乾回港，所以個喼依然係好難才可以將拉鏈拉合。去到機場寄艙時我今次終於都留意到我個喼有幾重 22kg，我係全團個喼最重家。無法啦！我怕凍嘛。

今日拉薩天氣轉差，沿途都下著雨沒有太陽，可能西藏這片樂土都不捨得我們離開。

乘車往機場途中，小曾突然好荒張咁，原來她遺留了當地旅行社-西藏世紀國際旅行社及香港中國旅行社送給我會的紀念證書。小曾飛奔下車轉乘的士返酒店取回我們的紀念品。

小曾這位導遊真的很負責任，沿途講解中國的歷史亦非常之清淅，於整個旅途小曾與我們分享了不少她自己的親身經歷，真的令我太開眼界，同時不能想像小曾是如此般的大膽。

去到拉薩機場，張太告訴我們，聽到小曾與旅行社的一段對話。本來我地個團今日就已經完結，小曾送我們到機場係是可以接待其他的旅行團，但係小曾因為未親自送我們離開，所以無接個job，仲同旅行社講明天才可以接團，這麼一個負責的導遊真的令我敬佩。

到達拉薩機場，小曾第一個就下車，為的只事為我們去推行李車，這麼盡責的導遊真的叫我佩服。在此祝願各位團友、領隊、小曾生活美滿、健康快樂、工作順利！

以下是沿途去拉薩機場的風景

去到成都機場，因為要等候轉機，Leo 問我有無興趣飲coffee，我咁鐘意飲coffee，雖然我已出發時我帶左3合1咖啡粉，但係都無乜機會沖來飲，咁難得Leo 見到有間coffee shop 我當然對眼發光啦！

原來起成都飲coffee 係好貴，一杯mocha 都要RMB58，今次飲這杯咖啡飲得好急，因為我地距離上機的時間好近，真係無乜時間可以慢慢品嚐這杯香滑的咖啡。本來我係想Leo 飲，因為沿途Leo 都不斷教我拍攝的技巧，但係我拎錢唔夠佢快，所以Leo 就請了我飲這杯美味的coffee。