L'oreal Sparkling Visible Color 5.54

自從做完手術之後，白頭髮又多了很多，忍了又忍，終於都夠4個月，又可以染髮，其實我自己唔係咁鐘意染髮，因為染得太頻密會傷害到頭皮，儘管白髮有好多，但都忍到4個月了！

今次係我第10次自己染髮，但總係覺得染得唔係好好，由其事係後面的頭髮係無可能染都均混，雖然自己染髮真係好平，但我總係覺得自己染髮係唔顏色唔會咁出，同埋好雞手鴨腳！

錢係唔慳得！下次都係去髮型屋整，或者係隔住隔住咁啦，因為出去染髮加剪髮都$1000左右，又唔係咁捨得，唯有一次出去染、一次自己染，一年大約都係可以染3~4次，咁樣荷包無咁傷。

今次買左L'oreal Sparkling Visible Color 5.54，其實係何顏色用起我頭上面都係唔出，唯有一堆白髮先至可以見到盒上所講的產色，久而久之我自己覺得買咩顏色都無所謂，只係想每隻色都試下，所以咪又買D 未用過的顏色。

呢個色係偏向黃褐色，都係一個幾好的顏色，我暫時用過咁多盒L'oreal 染髮霜自己覺得P66 / P64隻色係最靚。

Shopping date

今晚會去國泰城食自助餐，因為個個地方都好偏遠，加上只有旺角有車可以去到，所以我就早左少少出去花墟行下！

真係好鐘意種植物，每當見到植物慢慢的長高，心情會好開心。屋企盤紫蘇葉已經無乜朝氣，所以要買過第二盤種。

今日一出街就收到Biore深層淨化洗面膏試用裝派發，仲要連收到兩份，真係好開心！

去到花墟被盤咖啡苗吸引住，雖然盤苗有少少貴，但係買到自己鐘意的植物貴少少都無妨！咖啡苗$68，係歐洲入口品程，我唔期望可以種到佢生咖啡豆，但佢可以開到綠油油的葉子已經好開心。

去到花店有個職員講解，咁我又擔粗粗咁問下佢點種紫蘇葉，其實我都唔知點解屋企盤紫蘇葉會就快死，職員都話紫蘇葉好粗生，無理由會謝，不過點都好啦，個職員都解釋得好好。紫蘇葉有兩種，分為食用紫蘇葉及觀賞紫蘇葉，今次買了食用紫蘇葉，我唔會拎佢嚟食，只係覺得紫紫綠綠好靚，盤苗都係$8，希望今次會種得佢好d！

花寶已關閉以後都買到日本入口的肥料，唯有用返d平價版肥料......

行過花園街買了把強力風扇仔 $60 (多送一粒叉電)，夏天出遊係必須這把超涼風扇。

國泰城外的展覽飛機

國內儲值咭~一咭兩號

近來經常來往深圳，飲飲食食。

經朋友介紹買左中國移動呢張一咭兩號儲值咭。起國內有咩事都方便聯絡。

張儲值咭原價$120內含$60圓儲值額，於鴨竂街買只係$55。無得揀電話號碼，出奇地打開睇個電話號碼又幾靚、又易記！

只要將電話咭插入電話，即時致電香港任何一個電話號碼就可以啟用，非常之方便！

如果想keep 住個電話號碼，每月只須扣除$6月費。

至於數據方面，只要致電申請，而儲值咭內有足夠的金額就可以了，每次增值的數據有效期30日。1GB數據，$98。

增值都好方便，可以上網增值，用信用咭支付便可。

至於數據方面；

$1.5/MB (每日收費上限$48)

$38~200MB / *103*200*04#

$118~1GB / *103*200*05#

$198~2GB / *103*200*06#

數據會每月自動增值，如果唔須要用，可以每月到期日前取消，取消方法*103*02#

晚霞

今日放工時見到天色後美，所以行去搭船欣賞美麗的天空。

已經連續落左兩星期雨，估唔到天上還有厚厚的雲層！

天空上的美景，不同時候有不同的景色，今日見到醉人的景致，下次見到時可能又會唔同。

今日見到的晚霞真係好靚，由黃色的日落再轉為橙色，真係好靚、好靚。

靠估倒不如靠實力

睇圖表經常性都聽到朋友掛在口邊，甚麼技術分析、圖表，聽就聽得多，但自己就一D 都唔識！

呢本書兩年前已經見到，見佢解釋得幾清楚，不過一直都無買，因為怕自己睇唔明！

大時代下我都可以蝕錢真係要認真反思下！今日約左朋友起旺角等，佢遲左少少，所以我行左入商務睇住書等佢，入到去起當眼處又見到呢本書~技術分析攻略。用匯豐信用咭付款可以有8折，本書原價$150，折左$120。

希望睇完對股票投資更加了解，靠估倒不如靠實力、靠人比冧把倒不如自己發掘有潛力的股份。

雖然股票市場唔係我地呢D散戶玩，根據這幾時的投資經驗，股票其實係一樣好黑暗的投資工具，仍記得1480經典故事。要起大鱷口偷金，功課一定要做足！

Pekkle 喼

最後都不敵pekkle的吸引力！

四方八面收到消息，pekkle喼仲有貨，如果唔去買真係對唔住自己。

本來只係想買個20寸，最後連25寸都拎埋返屋企。

其實呢d公仔喼唔係咁好用，買喼一定要有牌子，除左個轆好d之外，仲無咁易比人訂爆。

不過都係貪得意買嚟玩下，如果用到4次以上已經心滿意足！

無懼風雨~深圳四圍行

今日朝早已經發出了兩次黃色暴雨警告，但依然無減我們為食的目的。

首先去左一田，睇下買唔買到心儀的鴨仔喼，可惜空手而回!

起沙田食左一個蘋果味的乳酪雪糕，$17/100g，我呢個雪糕$38.50，好好味!

等埋朋友一齊去深圳書城，個書城真係好大，有兩層，如果鐘意買書真係可以起度玩一日!

國內買到的旅遊書真係多，資料又齊備，價錢又唔貴，每本書約RMB30~50。買大陸旅遊書抵到不得了。

書成附近仲有Pizza hut、麵包鋪等等，仲有精品店，玩足一日無難度!

深圳書城交通~少年宮站，C2出口 (4號龍華線)，車費RMB2

行完書城就去今晚晚膳的地點~好兄弟草原碳烤羊腿，羊RMB58/斤，成餐飯13個人食，埋單都係RMB1430，真係好抵食！ 

餐廳：好兄弟草原碳烤羊腿

地址：福田區新洲南村104棟102號 (皇悅酒店對面)

交通：石廈站 (龍崗線)

燜燒杯~海底椰瘦肉湯

好耐都無再研究新款燜燒湯，起這兩個星期經常都係燜返之前成功的粥、湯，今日試左燜海底椰湯，湯渣太多唔係咁夠湯飲，下次要再調整一下個份量。

材料：
海底椰 10克
紅蘿蔔 150克
南北杏 10克
無花果 3個
雪耳 30克
瘦肉 70克

長洲~五行石

今日去左長洲遊玩及飲飲食食！

本來第一站係去張保仔洞，其實張保仔洞我之前行過，上網睇話起張保仔洞旁有條路可以去到五行石，而五行石的風景很美，今日行去張保仔洞時見到個條路，起遠處已經見到五行石，真係好靚！

我地沿指示牌行落去，但係條路好窄，又要攀石、澗水才可以去到！

最後我地走時才發現有一條路更好易行，不用攀口及澗水，就係於快樂之友士多旁的路行上去。五行石行入少少有一個石灘，因為個灘比較偏僻，所以沒有人清潔石灘上的垃圾。

我地起石灘上玩下水，坐下吹吹海風，真係好舒服！

因為朋友唔係咁行得，所以我地行完五行石就回程搵食。

我地坐低左食甜品時，突然風雲變色，好快就下起滂沱大雨，我地都要避雨，等了好耐，食埋晚餐之後兩停下，食飽再四圍行下，行到去一間準備結業的茶葉店買了一些綠茶、胎菊及雪菊就離開這長洲。

今日食左好多野，長洲好多地道小食，而長洲大魚蛋就非常之出名！大大粒真係好好味。

交通：中環搭船往長洲 (普通船$13.2~約1個鐘船、快船$25.8~約半小時船)

遠眺五行石

 多多美食 (金毛雞蛋仔) ~ 大大粒魚蛋$10/2粒，魚蛋爽口彈牙，又會魚味

芝士焗蠔~$35，蠔好細粒，入面放左3隻細蠔，有好多洋蔥及煙肉，但唔夠芝士

芝士焗龍蝦~龍蝦好新鮮，有好多洋蔥及煙肉，但唔夠芝士

 行完五行石去左呢間餐間食甜品，唔記得餐廳個名，我地因為門外的招牌~蜂巢雪糕而來！

但係個蜂巢雪糕什果無得特別，所以我點左菠蘿冰涼粉$28，又大碗又好食。

海龍王海鮮大排檔~點了2人套餐，海鮮好新鮮，一個2人set $298 

於茶葉鋪見到有呢d 好古色的茶杯，即刻影底做個紀念！

神仙股~1480

近期股事暢旺，好多二、三線股被人瘋狂炒起。

今日市場上出現了一隻神先股~1480，佢係半身股，招股價$1.23，近排呢隻股票不斷比人炒高，今日仲一度出現一個奇景，股票由開巿時30.01，一度炒高至$102！如果一開市入左，而可以於高位走，一手可以賺$143,980。

呢隻股票成為大家的熱話，但係如果高位追左貨的散戶，真係替佢心傷，因為股份由高位回落，收巿倒跌，得返$17.44。

股巿大起大落，記得要睇位落車，切忌貪心，輸錢皆因贏錢起！

豆腐白蘿蔔麵豉湯

早幾日買左d麵豉，所以今日用佢嚟整湯。

簡簡單單又一餐。

好耐都無去街市買餸，尤記得幾年前我買豆腐時都係$2，今日買已經係$4……百物騰貴……

材料：
豆腐 1件
白蘿蔔 130克
龍旋燥 5克
麵豉

燜燒杯~紅菜頭紅蘿蔔粟米瘦肉湯

尋日去行完山，走時經過黃泥墩村內的農田，當時有個姨姨起度灌溉緊農作物，個姨姨話可以賣佢田裏的農作物給我們。

姨姨說她的田是用有機耕作，絕不用農藥，見到農作咁多新鮮，所以我地都買了一些菜回家！

我自己買左紅菜頭，朋友買了生菜及苦麥菜，從來都無起街市見到有苦麥菜買，所以我又要左少少！

苦麥菜有少少苦，菜好爽脆，菜好鮮甜，菜時即時起農地上收割，份外鮮甜！

紅菜頭就用嚟燜湯，紅菜頭係超級食物，味道帶甜，其含有錳，可與鐵合成肝臟及紅血球的所需養分，亦含鐵、鈣、鉀、磷等多種礦物質及維他命，有强健骨骼及補血等功效。雖然紅菜頭相當有益，但糖尿病人及血糖偏高者，均不宜飲用紅菜頭汁，以免攝取過多糖分，叻腎病患者及低血壓人士亦不宜食用。

材料：
紅菜頭 2個連葉 (約80克)
紅蘿蔔 1條 (約200克)
粟米 80克
瘦肉 100克

即時收割的農作物

Badger Broad Spectrum SPF34

Badger 的防晒+驅蚊每款夏季都缺貨，我起3月頭時已經訂定，到今日行山終於都可以試下個質地！

好耐之前已前用過Badger 的驅蚊膏，效果好好，因為自己個人好懶，見到佢有一隻係防晒連驅蚊的二合一產品，實在係太好了！

但之前起報紙睇過話二合一的產品效果唔係咁多，但係方便呢樣野真係好難忍，呢個產品仲要係防水，真係沒有理由唔買佢。

產品是物理防晒 (Zinc Oxide)，利用反射方式抵抗 UVA、UVB。質地比較厚及侷，比較難推開，但產品保濕度高，加上有陣陣清香的香茅味，整日都無比蚊咬，效果好好！已經買了給家人用，好野一定要同大家分享，同事亦都希望這個夏天大家都能得到防蚊的保障。

*全天然保濕防曬及防蚊霜  

*不含化學成份

*防水、防汗
*有效防紫外線 UVA – UVB，幫助防止曬傷

*防蚊 (不含DEET, 避蚊胺)

*即是在水中活動，其防曬功效達40分鐘

這個產品是於iherb購買，如大家想買，付款時可以輸入Coupon code:TGD808，首次購物滿USD20可以減USD5，滿USD40可以減USD10。

購物網址：http://www.iherb.com/Badger-Company-Anti-Bug-Sunscreen-Broad-Spectrum-SPF-34-2-9-fl-oz-87-ml/23831

大棠自然教育徑，麥理浩徑第9段~大攬涌水塘，第十段+元荃道

每個月的行山活動又到啦，今次係我手術後第一次行山，行完山個人都精神左。

今日行山地點係位於元朗，我地約起旺角彌敦道搭68X去元朗，於元朗大棠路站下車 (約45分鐘車程就到元朗)，下車後就去食早餐，食飽先至有氣有力行山去！

搭的士去到大棠公園~燒烤場附近下車！

下車時有點點的雨粉，最後都天朗氣清，感恩有放晴的天氣。

今日行的路線係越野單車徑，沿途行的時候都好多單車經過！

估唔到香港咁煩囂地方都會有咁多山路.......

行了大約5小時 (中間應該有成45分鐘係坐下，休息下咁的時間)！

本來係唸住原路入原路走，誰不知行錯了路，所以走時去了黃泥墩村！

經過一些農田，我們還買到一些即時收割又新鮮的蔬菜！