今日放左一日假去左澳門睇水舞間，但係去之前我地係買唔到門票，因為daisy 上星期睇完佢話可以買即場門票，所以我地都係抱住去到先算的心態。Daisy 要同佢屋企人下午才出發去澳門，所以我同煩人一朝早就啟程出發去澳門觀光，因為次次去澳門都係入賭場，我自己又唔會賭，所以每次去到望住佢地玩都幾悶。
其實都無乜特別去安排過個行程，本來唸住搭的士去幾個博物館，所以連交通路線都無check 過，只係上網搵左幾個地方想去食！但係最後我想去食的餐廳全部都去唔到，因為時間太急連我至愛的最香蛋黃杏仁餅都買唔到。
但係今日個行程真係笑爆咀，或者係有我起度啦，煩人就話比我激死，我就話佢要多謝我啦，我為佢帶來咁多的歡笑聲，又帶佢參觀左咁多個景點，佢都寸我話佢去過澳門咁多次，從來都唔知起大三巴有咁多個景點，真係行幾步又係一個景點！
我地搭左10:00am 船出發，11:23am 落船，因為要搭個幾鐘船，為便於船上太悶所以買了一本雜誌及一本澳門的旅行書上船睇，我當然主攻澳門旅遊書，我越睇就每個地方都想去，但係約左Daisy3:30pm 起新濠天地等，所以觀光的時間有限，今次只係行晒大三巴附近的景點，仲有好多地方未去，我唸都要再安排多一次去睇水舞間同埋下次個trip要3日2夜，等我可以行混成個澳門至得！
11:23am落船第一眼見到就係漁人碼頭這個城塔，影抵去只係想知幾多點落船
我起碼頭見到雜誌當有得買澳門旅遊書 ($63)，所以買左佢上船睇，這本書介紹左好多食店，真係越睇越想食！
去過澳門好多次，但係完全唔知澳門D 街道名，只係以大三巴為地標，因為今次我想去觀光，所以我終於都認識多少少澳門這個地方。
我地落船後起碼頭搭左免費接駁小巴去新葡京，再往大三巴的方向行過去搵食！
本來想去阿蘇介紹個間麵家食蝦子撈麵，因為煩人之前一晚話我知佢去過食，知道間鋪起邊，所以我無check 過間鋪叫咩名，就係咁就出事啦！
佢同我行到去聯記就同我講應呢間就係阿蘇介紹個間，我起個門口望左好耐同佢講應該唔係呢間，正常被採訪過應該會將所有訪問貼晒起個門口度show off，但係我望來望去都見唔到有，煩人又起度話係呢間啦入去啦，咁咪唯有跟住佢入去，食完出返離行行下見到一間叫祥記門口好多人排隊，我好奇走埋去睇睇，完來祥記麵家先至係阿蘇介紹個間，真係激死我啦！
荷蘭園大馬路115A-B鋪
蝦子雲吞撈麵 ~ 麵好彈牙又無簡水味，配了炒香的蝦子，味道都幾特別
芥蘭魷魚 ~ 無乜特別下次唔會再食
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
食完蝦子雲吞撈麵其實都唔係好飽，因為仲有好多野想食無謂食到咁飽，唸住到3點左右再來一個下午tea (本來係想去官也街食豬扒飽及燕窩蛋撻)，所以食完聯記之後啟程去觀光，我地行行下去左福隆新街，竟然比我見到譚家魚翅，之前個plan 入面係有呢個地方要去食，一見到佢我就衝左入去，反正之前食得唔係好飽，所以我地叫左佛跳牆& 翅，呢間d 翅細細碗都幾岩我呢d 咁細食ge 人食！
新馬路福隆新街48號地鋪
這個硬殼果仁好好味又脆卜卜，我好鍾意
對比剝殼前後的果仁
石窩中鮑翅~上枱時滾到起泡
足足滾左3mins 終於都涼了少少無再大滾
聚寶佛跳牆 ~ 個湯底好濃好鮮甜
