早幾個星期見到我盤274長出了一個側芽，而佢的生長速度都相當之快，襯住今日係復活節假期，加上又約左yoki 起粉嶺接埋佢地去食buffet，所以順道入埋去發叔度，今次去發叔度的主要目的係帶我盤274入去做手術，本來係想將盤274個側芽分盤。
點知一入到去發叔度比盤花佢睇，佢即刻話我種到盤花無晒生氣，又話我唔識得種，其實我每晚都花好多時間管理我的盤栽，奈何我都係照料得佢地唔好。發叔一拎起我拎274就話盤花太多老葉，如果過多一個月唔拔掉老葉，那盤花就會命喪黃泉。
佢話我盤花吊腳，我初時唔係好明發叔想表達些甚麼，於是發叔就好有耐心咁教導我，原來係我落泥太少加上平時D泥乾左跌走晒，所以泥越來越少，發叔拎起我盤274手起刀落咁好火速就拔掉了十幾片走，當時相當之心痛，而側芽發叔話唔好要佢，所以又掉埋去！跟住發叔反轉我盤274比我睇，佢話我盤274個主幹已經開始腐爛，好再我今日拎入去比佢睇下，發叔拎起比我睇單憑肉眼已經見到274有輕微的腐爛，經發叔醫治完我盤274又變回一個迷你品種了。
發叔教我換泥時將所有泥倒入花盤後要用手指輕輕力將泥土壓實，如果唔係泥土太鬆就會吊腳。今日總共帶了兩盤花入去發叔度，仲有一盤係8號，因為自佢買回來後佢一直生長得不甚理想，而且葉片越生越細，完全沒有生氣及葉邊有枯萎的徵象。發叔又係幫我拔掉老葉，佢話我都唔係愛花之人，佢話盤花已經話晒比佢知
，其實我真係好認真咁種佢地家，只可惜...入到去發叔度當然係忍唔住帶多一盤花返屋企啦，今日發叔個花場都幾多花開左，所以要拎花都幾方便，發叔話我種到D花咁都唔係咁適合種D貴品種，所以有一D 好貴的品種發叔都唔賣比我。
可能今日係假期，好多人入去發叔花場參觀及購買紫羅蘭，所以我都唔方便起度問問題，好在我早去到如果唔係發叔都唔得閒幫我救救紫羅蘭了
！臨走時我比我盤C85張相發叔睇，發叔一望就話要拔掉一行的老葉，如果唔係盤花都係等死，發叔怕我唔捨得，佢叫我下次將所有的紫羅蘭帶晒入去比佢幫我執下佢地喎。
今日的買到紫羅蘭係S516+Carnation Sprinkles 同之前一樣都係買左個花苗$200，發叔話好快會開花，叫我慢慢種喎！
我返到屋企即刻幫我D 盤栽換泥及檢視佢地個主幹有否腐爛，之後仲將385,S617+,C85的老葉一口氣拔掉，場面真係好壯觀，起拔葉其間見到S617+(日本妹)已經有花蕾了，真係好開心即係好快我又見到佢開花了。其實我現在的紫羅蘭全部都已有花蕾了，有部份仲開緊花添，雖然我種得佢地無發叔咁好但係我都係真心付出地去照顧佢地o家，絕無偷懶...希望你們都能安然渡夏！
274
8
C85~拔葉前
拔葉後
一口氣幫C85拔掉10塊葉，連埋之前拔左個8塊葉已經拔掉了18塊葉，佢的身型由重量級變為輕量級 ~ ~
385~Rob's Penny Ante拔葉後。
385已經種了差不多一年，買回來時只係一個好細少的花苗，由買回來只係開過一次花，一等就差不多一年，其實之前係見到佢有生花蕾，但係生極都生唔到出來，上次去發叔到得到發叔的指教，發叔話咁耐都生唔長，話花蕾已經死左叫我放棄佢地，原來發棄都唔係一件壞事，起碼今日可以生長到超過10個花蕾，如果可以一次過開晒場面一定好壯觀！
今次拔左9塊葉，其實都唔係好明點解385好似拔極都仲有好多葉咁...
今日買的S516+Carnation Sprinkles
沒有留言:
張貼留言