隨變

上次去佐敦食串燒，路過一間食麻辣雞煲的火鍋店，上星期見報紙介紹話係正宗四川菜，所以特登再去佐敦試下，今日7:30pm去到，店外已經大排長龍，我地一等就等到9:20pm。

等左成2個鐘實在係太肚餓，起等位的過程我地已經揀好左食物，所以一坐抵就可以落單，起度等位的時候見到店內的食客個個都食到滴晒汗咁誇張，我又要就某人，所以我地今次個麻辣雞煲只係要左小辣，某人就食這個小辣食到噴火，但係我就完全食唔到有辣味...所以我就叫店員比碟辣醬(中辣) 我，個辣醬好香，仲有一些好特別的辣味。

這個店鋪的食物名字好得意家，真係棍打牛筋丸好彈牙...見到人地打邊爐食烏東，所以我地又叫左，某人都唔知係咪太餓，我都未影相就倒晒入個煲到，真係激死我啦！原來個個唔係烏東，叫做隨變粉，係該店自家製作，好滑的麵條，但係煲耐左佢會由白色變成透明...墨魚咀又係一個好得意的食物，平時打邊爐都無見個有這款食物...

一直起店外等候，不斷見到店員好火速咁收拾桌面，讓下枱食客進食，執枱之火速實在令我驚訝...
我都係第一次為左要食一間餐廳而等咁耐！um...如果要等成兩個鐘，我自己又唔覺得好味到值得要等咁耐，可能都係慕名而來啩，試過一次就夠，我唔會再返去食囉！

隨變麻辣雞煲

蓮藕片、秋耳、墨魚咀、真係棍打牛筋丸、一定回味魚片頭、凍豆腐

響玲卷 ~~ 索晒d 湯好正

秘製辣醬~有生蒜、乾蔥、辣椒、麻油等

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

隨變麻辣雞煲 (半隻) $73

蓮藕片 $8
秋耳 $11
墨魚咀 $10
真係棍打牛筋丸 $11
一定回味魚片頭 $11
凍豆腐 $9
響玲卷 $18
隨變粉 $18
生菜 $9

可樂 $8x2=$16

Total:$194