神阻擋驕傲的人、賜恩給謙卑的人。(雅4:6): Standard Chartered Marathon 2014

2014年2月16日星期日

Standard Chartered Marathon 2014

又係人生的第一次~~人生第一次的半馬！！！

我之前一直都以為跑步只係靠對腳，但當我真真正正開始練習先至知，原來跑步係有好多方面的配合，包刮心費功能、體力、耐力......我自己都知道練習不足，報名之前朋友同我講過因為有時間限制，如果未能於指定時間內到達某個check point 大會係會安排車送走我地；所以我好安心咁報名。

今日凌晨3點鐘就起身準備，因為當日係會封路所以唸住去旺角搭地鐵過去，同埋我呢個路痴唸住個個時間個個都搭地鐵去跑，心唸到時跟住人地行一定會去到目的地！誰不知如意算盤打唔響，我約4點去到旺角點不知銀行中心個閘口無開到......最後咪好戇居咁起旺角搭的士過去囉，早知係咁一早起屋企呢邊搭唔駛行嚟行去，再有機會跑的話我一定會搭的士去會場，咁仲可以瞓多半個鐘等我有足夠的精神跑。

去到會場見唔到有好多人，所以有少少擔心最後都搵到寄行李的地方，因為本書話要早一個鐘頭去到寄行李，過左時間無得寄，初時我唔唸住寄行李，但因為天氣凍我都要著羽絨出去，如果唔寄行李我件羽絨點算呢？最後都係去左寄！

之後就去左起跑點，時間岩岩好，去到就已經起跑，初時因為人太多都唔駛點樣跑，到去到佐敦就已經開始人已經開始疏散，已經係要開始跑，去到個個位已經過左1km我已經開始無氣想停，但係我兩位好好的朋友話依加仲早等埋我一齊，所以我頭2km 都係咁跑無乜點停，人開始越跑越遠，我同佢地講唔駛我，因為我唔想阻住佢地，點知佢地同我講唔好咁早放棄，點都要跑到去折返點先至可以坐車，仲叫我去到折返點影張相比佢地睇！

當我地到3km的時間我就已經好想坐車走，但係仲未有車，我不斷的回望目的只係尋找傳說中的巴士送我去終點！沿途不斷有好多人為跑手打氣，我今日先至知道原來有人同行 / 鼓勵個種感覺係咁好 (經過今次一改我對人冷漠的態度)。

去到10km我即刻check 下自己的時間，岩岩1:30分鐘個刻我好想跑去個牌到覽住個牌起度喊，如果唔係我太自負我已經順利完成可以返屋企休息，但現在我要繼續向前跑，人應該量力而為.....

當我跑到去12km 的時候我開始感覺到腳趾尾已經生了水泡，痛已經令我無法再跑下去。我出門口時已經搽了凡士林，但忘記了腳趾尾平時都有生水泡，所以無做足預防措施。

由入西隧開始已經係行到，當準備出西隧口時聽到有車聲同廣播的聲音，當有廣播聲時我見到前面的跑手已經即時開始跑，當時我超開心因為我以為我已經等到傳說中接跑手走的車，當車駛近時我好失望！因為唔係我等緊的車，而係警車駛過，無辦法唯有繼續行，出西隧時已經去到15km，沿途不斷有人為跑手打氣，我終於都忍唔住問幾時會有車坐，點知個工作人員答我佢都唔知，仲同我講仲有6km 比心機跑埋去啦，加油呀！既然都上左賊船我都無得揀，只係不斷行不斷唸d 鬼主意好想偷走，但無奈我之前寄左行李，同埋身上又無錢點走呢？起無得揀的程況下我最後都係成功抵達終點！我全程用左3小時42分跑，雖然係比起大會指定的時間遲左42分鐘，但係我相信只要再練習一下，下次我一定可以於3小時內完成！

去到終點要拎返我件行李，天呀！要行到去對面中央圖書館先至可以拎返，心依然繼續唸早知唔寄行李，咁我就唔駛咁煩，又凍又要行去咁遠，仲要對腳咁痛，拎完行李已經好想即刻搭的士返屋企，但係我又唔知邊度可以截到過海的士，對腳已經唔受個腦控制，心唸又封路，行去搭地鐵好遠之餘我仲要轉車，我真係唔想行咁多路，無可奈何下我本來唸住去天后搭地鐵，感謝主！當我行返去維園都唔駛我行又唔駛我等我就見到有一部巴士可以經過我屋企附近之餘，架車仲駛緊埋站......平安歸家！
返到屋企脫下跑鞋成對腳都鬆晒，在望下雙腳全是水泡，真係唔敢相信腳趾"拿"都會起水泡......雖然出發前都搽左凡士林，但係搽得唔夠呢~~

跑得咁辛苦，今晚去左8度海逸食buffet 補充返今日消耗的卡路里。

感受：終於都參加了第一次的馬拉松，由好自我了解自己的體能一開始就好自大咁報左半馬，到開始練習先至明白自己性格上的決點。到今日比賽時比一個又一個跑手超越時的感覺真係好難受，但主有祂的美意，祂讓我明白要我好好享受今次的比賽，比賽並唔係要同人地競爭而係個過程！慢亦有慢的好處可以慢慢感受神造物的奇妙，可以慢慢享天由天黑到天亮的過程，包尾去到每個水站都有充足的水比我飲，亦都可以獨享一條天橋又唔迫又舒服又唔會怕阻住人地！而最大的改變係沿途的鼓勵真係好大的動力幫力支持跑下去，只係簡單的一句加油就可以令我撐住，真係一改我個人一直覺得有無呢d 說話都唔重要的唸法。