我的美麗日記

經濟開始轉差，近日經常收到朋友寄來的減價優惠，真係每日check mail 都係coupon, staff sales......咁我都會睇下地點是否就腳先至會去買野。但係其中一個mail 就係介紹話我的美麗日記會有聖誕set賣，一盒$138 共有23塊，成個系列都齊晒，岩晒我呢d鐘意試新野d人。仲要平均每塊都係$6，真係好抵用。

加上近排天氣乾燥，每日敷一塊都唔會肉赤。不過我塊皮又唔生性，又似係敏感....每晚洗完面都好痛，所以一直都未可以用，希望塊皮乖d 快些好番啦！
各面膜的功效可參巧官方網站我的美麗日記

薯仔炆雞塊

以下這個是蘇施黃的食譜, 但有些步驟我無跟住離整。自從我開始睇蘇good 後，起初對阿蘇教整的食物很有興趣，但係漸漸地覺得佢的煮法很不健康，經常用大量的油、大量的糖。所以，我見到她的食譜都會將有大量油 & 糖的部份刪減，咁可以健康d嘛！

今次煮這個薯仔炆雞塊好有滿足感，拎住支豉油係咁倒落個鑊度，個種感覺真係好滿足，仲一路煮一路試味，真係好開心，因為怕為太喊，好在最後味道恰到好處。

材料:
薯仔        2個
洋蔥        1個
雞扒        2塊
醃料:
生抽        1湯匙
老抽        2湯匙
糖            2茶匙
生粉        少許
麻油        少許
烹調步驟:
1. 雞肉加入醃料醃約30分鐘, 薯仔用刀切角, 備用；洋蔥像切橙一樣切六至八角備用。
2. 雞件先用油爆香，加入醃雞塊的汁（生抽、老抽，糖、生粉、麻油）。
3. 先爆洋蔥，加少許糖、老抽。

4. 煎薯仔至少許金黃色。

5. 放入薯仔、洋蔥，加水調味（如有必要加點生抽、老抽、麻油）炆半小時至四十五分鐘便可。

欖菜蒜蓉蒸茄子

放工返到屋企，又未有飯開，加上近排又大食左，真係超肚餓。

媽媽又要我煮，咁我就用最短的時間製作了這個又簡單又好味的餸菜。這個餸係放工返到屋企，又唔係太想整野食的首選。

材料：茄子、欖菜、蒜蓉

做法：將茄子伴勻欖菜、蒜蓉，大火隔水蒸15分鐘

麵醬炒油麥菜

又開始有一段日子沒有下廚了，因為都病左超過一個星期，無乜心機下廚。唔知係唔係d病菌越來越利害，我食左咁多日藥都未好返，搞到我覺得自己係一個藥煲。算把啦，可能d抗生素都不敵這堆惡菌。這堆惡菌搞到我成日好攰，無心機下廚，所以今日簡簡單單咁煮左個麵醬炒油麥菜。

話說很久以前起某某酒樓食lunch 點了這個菜，簡直係一試難忘，次次去到酒樓，例必會點這款菜吃，現在自己親自下廚，可以一嚐炒這個菜。終於都煮到啦，都算成功。

我都係第一次炒菜，完來炒菜都幾困難，好在家裏的鑊夠大隻。這裏只是得一斤菜，己經可以放滿整個鑊，炒的時候亦比想像中困難，因為實在太多菜，好難轉動佢，好在最後個菜的樣子靚靚。
今日本來唸住去雜貨鋪買一包包散裝的麵鼓醬，見到一包得咁少怕唔夠用，所以問下老闆有無樽裝的麵鼓醬，點知又有喎！買完之後好開心。其實我一直都覺得散裝的麵醬好污 jo，就咁用一個透明膠袋裝住，用一條繩綁好，我成日都唸雜貨鋪咁多食物一定養活好多曱甴，所以我每次倒出來用的時候都會小心翼翼，唔想d醬掂到個袋.......依家樽裝都應該會衛生點！

材料：油麥菜、麵豉醬、蒜蓉、糖 

做法：

1. 油麥菜洗淨切段

2. 爆香蒜蓉，下麵鼓醬爆香
3. 下油麥菜，加少許糖，炒至熟透即成

貼士：
1. 麵鼓醬要先用油爆香才炒菜, 這樣可以令醬料更香

2. 因麵鼓醬帶有鹹味，加少許糖可中和麵鼓醬的鹹味

Pekkle 公仔頭形碗

早兩日起檸茶個blog 度見到佢話有精品公司開倉，$20就可以買公仔頭形碗，其實都有少少心動想買。

點解會係少少心動呢，咪就係因為無pekkle 份囉。$20真係好平，見到melody 又幾靚，都想買一個返屋企用。但係唸下唸下都係唔要買，可能遲些pekkle 都會出呢。這個係我的幻想！

唸下唸下，我之前都有一個pekkle公仔頭形碗。好辛苦咁搵左佢出離同大家分享下。
其實起yahoo 都見到有得買不過真係開天索價要$499。我這個係朋友送給我的，雖然我都唔知當時買要幾多錢,但係斷估都係百幾。我見到個個賣家放出來賣先至知道原來同款仲有一隻杯，真係好靚。好想擁有，奈何價錢又係$499。唔係無錢買，只係覺得唔值咁貴，所以購買念頭好快又消失左。如果佢買$200左右，我唸我已經擁有左lu，算啦得到又未必會係一件好事。因為銀包會患上乾硬化症，好難先至會醫得好

韓式炒年糕

今日自己起度亂咁炒韓式年糕！早幾日去左尖沙咀韓國街，因為我未去過這條街，我只係知道起尖沙咀，所以上網搵過個左地址，點知比人騙左，好多個人都話係金巴利道，咁我咪行晒成條金巴條道，沿途只見到有1-2間韓國餐廳，跟住全部都係婚紗店，完全都見唔到韓國超市，行完這條金巴利道真係有d失望。亂打亂撞，比我行落左一條街，終於都見到韓國超市，不過又係失望 - 摺左 (心唸又係金融海嘯的衝擊???)。跟住又抱住失望咁向前行，終於都見到一間小型的韓國超市。入地去空手而回，因為所有貨品都係韓文，店主相信都是韓國人，所以我無買到任何物品走了。
之後再行前少少，有一間大d的韓國超市。我起入面行來行去，今次總算滿載而歸。起初我聽到店主講韓文，但後來我又聽到佢講廣東話，所以我就攞住一些 疑似是我要買的物品去收銀處問。 問題1:
我：請問我想炒年糕，應該用圓柱形或是扁扁的。
店：圓柱形是來炒的。扁扁的是煮湯年糕用。
問題2:
我：炒年糕是用哪一款韓式辣醬？
店：用已調好味的辣醬。(因為她估我唔不懂得炒的！)
我：咁這個盒裝的韓式辣醬與包裝有何分別?
店：盒裝未調味，你未煮過好難控制。
我今次去了New World Mart 選購。正確地址為：尖沙咀金巴利街5號地下。
於店鋪門外看見有石頭鍋賣，真是有些好奇想買一隻返屋企試試煮石頭窩飯~ ~ ~

因為唔知正式的韓式炒年糕是用甚麼配料，所以我今次用了泡菜、肉、原粒粟米來炒。這包辣醬真的很辣，但亦帶少少甜 (可能就係所謂的調味辣醬) 都幾好味~ ~ ~
P.S. 金巴利街與金巴利道只是一街之隔，記住唔好行錯啦！

這包就是已調好味的韓式辣醬$25 (都幾貴)，全部都是韓文，真是看不懂呢~ ~ ~

韓式辣醬的包裝袋後面有圖教點煮，我都係看圖識字咁跟住整。
韓式年糕買回來的時候是暖暖的，相信是新鮮製作。
仲買左一大桶的泡菜 (Kimchi)

材料：韓式年糕、韓式辣醬、泡菜、肉條、粟米粒、蔥
做法：
1. 肉條加入生抽、紹酒、生粉、糖醃20分鐘
2. 將韓式年糕切短
3. 下油爆炒粟米，盛起備用
3. 下油炒熟肉條，盛起備用
4. 下油炒年糕片刻，下水&韓式辣醬，不停的兜動年糕，以免黏鑊
5. 將所有的配料下鑊同煮至熟透即成

 

梅菜蒸肉餅

上星期整左咸蛋蒸肉餅，今日再試整多一次，但係就唔用咸蛋，改了用梅菜。因為個肉餅要加大量的水份，今次又想試下大概須要加多少水，原來這個肉餅係須要加大概半碗水，嘩得個少少肉，都要加咁多水，唔怪得知阿蘇話佢的肉餅係好輕啦！

今次製作這個肉餅有些失水準，因為今次加水比起上一次整咸蛋餅時加的水份多了，而豉油的份量唔夠，所以今次的肉餅唔夠醎，蒸好左已經無辦法補救，唯有下次再整的時候加多d豉油，不過我唸短期內都唔會再整，因為都要幾多時間去剁肉........好攰呢！

由星期四開始病一直都未病癒，所以蒸肉餅之前起個碗到唔記得搽油，蒸左之後先至記起，心唸個肉餅一定會黏實隻碗都幾失望，點知蒸完之後見到個肉餅都唔係黏得好實，雖然個肉餅轉唔到，但係都夠鬆，咁都算無白費我剁肉餅的心機。

材料半肥瘦梅頭、梅菜
調味料
生抽、老抽、糖、麻油、油、生粉、紹興酒
做法
1. 剁碎豬肉後加入生抽 (要多些)、老抽 (取其顏色)、糖，醃25分鐘
2.加入生粉、少少油、麻油拌勻，然後逐少逐少加水，順時針方向攪拌，直至碎豬肉在碗內攪拌時是變得輕身，臨蒸前加入紹興酒攪勻，再放入梅菜攪勻。

3. 預備另一隻闊口扁身碗，先搽油在碗內，再倒入碎豬肉。

4. 隔水蒸25分鐘即成。