菜乾青紅蘿蔔西施骨湯

今日呢煲湯唔係我煲家，係我指揮我老豆煲o家

話說媽媽買左西施骨返屋企叫我煲湯，因為我要準備考試，所以我話好忙，媽媽當然問有乜咁忙，仲話唔理我一定要我煲左去。唉！係完全唔諒解人地讀書辛苦。我即刻唸左一個好簡單又快捷及易煲的湯，然後老點我老豆去買埋餘下的湯料，一D簡單唔麻煩的事我老豆好樂意做家，但係次次叫親佢幫手煲湯，個煲湯一定係好大堆頭，佢話喎反正都要煲，煲多料或少料都要用咁多石油氣，所以一定要煲滿個湯煲喎！

今次煲湯只係得一條粟米，我老豆話粟米好貴，一條要$4.5，佢話咁貴只可以放一條，仲話唔係一定要食佢喎，叫佢買多一條都唔肯，就係因為咁煲湯煲出來無咁甜，好重蘿蔔味囉
材料：菜乾、南北杏、粟米、青蘿蔔、紅蘿蔔、麥棗、西施骨

張相睇落朦朦地咁，我又係一打開個煲蓋就影，因為咁大堆頭，好難等煲湯凍左先至影，因為一凍左少少媽媽就會煲返滾去所以都係由得佢朦朦地啦！