烏蚊騰這段已給係第二次係行了，不過今次係延長版，由烏蚊騰開始，經荔枝窩往鹿頸，今次這段係我行山以來第二辛苦的一段。
行到去荔枝窩，大部份行山友都會食的客家菜~有記，今日終於都可以試，只係做星期六、日，枱枱滿座，仲要好多食物都沽清，不過又真係好好味，朋友介紹話佢的盆菜都好味，不過要一早預訂，仲要開始行之前打電話同店主溝通好，咁行到去就有得食。
食飽就行埋餘下的行程，仲要係超辛苦，辛苦位係由荔枝窩開始，頭段仲唸呢條路線係極輕鬆，點知起尾段嚟料，尾段係碎石、高低不一的石級，每踏一步波子骨都受到不同的壓力，越行隻腳就越痛，最後只好龜速到行，幸好有一位好識照顧人的朋友Vano不斷默默地守護著我。
最末段到了一海之隔的深圳灣，條路都好長下，雖然係平路……天呀！到出鹿頸個位仲要上一段樓梯，又攰又痛！
全程有好多洗手間，飲多了水都唔怕無洗手間。
交通:
由大埔墟鐵路站坐的士入去烏蛟騰小巴站下車 (車資約$100)
鹿頸離開可於（陳鳳記士多及BB開心茶座）外坐56K小巴，但行山旺季太多人等車，建議我用45分鍾行去沙頭角坐巴士往上水或粉嶺。
行了7.5小時連埋食午餐時間，最尾因為有接近200人排隊坐小巴56K，所以我們用多了45分鐘行左出去沙頭角坐巴士270A，扣返食飯及行去坐巴士的時間，行呢段約須5.5小時。
烏蛟騰 › 九担租 › 上苗田 › 下苗田 › 三亞涌 › 三椏村 › 印洲塘海岸公園 › 荔枝窩 › 分水凹 › 谷埔 › 鳳坑 › 鹿頸
