神阻擋驕傲的人、賜恩給謙卑的人。(雅4:6): 5月 2010

2010年5月30日星期日

紫羅蘭

自從復活節去了花墟買了一盤紫羅蘭令到我太開心啦

因為種了差不多兩個月，現在依然在開花中

之前有個同事同我講話佢自己好鐘意捆邊紫羅蘭

捆邊???給我一個好大的問題

於是為了滿足我的好奇心，我當然係上網找找甚麼為之捆邊
嘩!!!於非洲紫羅蘭世界比我發現原來紫羅蘭的品種可以如此的多
而花的顏色、形態實在太吸引我了
於是一直都好想去買，但係筲箕灣這個地方真的太遙遠
後來朋友告訴我，花墟亦有一間花店有很多特別品種的紫羅蘭
等了幾個星期我終於都去左花墟了
我真係好彩一去到花墟已經搵到間花店
原來紫羅蘭真係可以好貴，本來我睇中左一盤但係實在太貴$298
最後我選了以下兩個品種

385-Rob's Penny Ante 呢盤係紫羅苗，我見佢又有花開緊，由於係特別品種，大盤又太貴，所以選了苗來種$50 OK 啦

274-Rob's Smarty Pants 呢盤店員話係本地品種，本來去到間花店，佢有一部份花是暫未發售，店員叫我過兩天再回來選購，由於我係特登過去買，所以店員都幫我向老闆詢問可否賣給我！

這個品種初時話賣$100，但最後付款時店員再拎住盤花問老闆是否收$100，最後係收我$60

朵花好特別，白色底，捆青色邊，中間粉紅色，再有淺藍色噴點--->真係好靚
花店地址：旺角(花墟) 洗衣街219號地下

2010年5月29日星期六

Ahava Gentle Body Exfoliator

一向對身體磨砂無乜太大的感覺

又唔覺得用完之後身體的皮膚的狀態有所改變

以前只會一個月或者幾個月才做一次磨砂，但用過Ahava Gentle Body Exfoliator後

令我每星期都好想做一次磨砂

用完這個磨砂後，皮膚的質感好像絲般柔滑

砂粒亦好幼細，至於價錢方面比起BODY SHOP 之類只係貴了少少

2010年5月27日星期四

橙皮

都未來得及做防蚊準備就已經中招

仲要起我對手對咬左最少四次，都仲未計對腳

唉，都唔明我係咪甜到咁呀，D 蚊任何機會都唔放過我

早排睇報紙講，原來蚊係唔鐘意橙皮的氣味

於是無聊的我

又走去試下曬橙皮

唸住起床頭、床尾、書枱...四圍都放D 嘛
反正橙皮本來都係垃圾，現在廢物利用都幾環保
最重要是沒有任何有害的化學成份嘛
已經試左幾日，只係放起乾橙皮起牀邊，起身都無見到被蚊過的痕跡....
經過我反覆的驗證，證實這方法是無效
橙皮雖然晒乾了但不知何解日子耐了會發霉，同埋有些小動物滋長，建議大家切勿使用這方法

2010年5月25日星期二

HTC Desire

終於都忍唔住換左部電話

其實兩個月前已經好想換左部電話，奈何當時想買個部電話無貨

等下又一日等下又一日

我部舊電話令我忍無可忍

我終於都忍唔住放工即刻去買

其實呢部電話出左一個星期左右咋

一見佢出現經開始步署及計數，點樣買佢係最平

Desire係One 2 Free 獨家代理，所以要有0機價優惠只可以用返One 2 Free，但係Plan 超貴$549+$15增值服務，18個月合約

我本身係One 2 Free 客人，舊客個plan 要用$278 包500M data，仲要加$15增值服務，而機價就要$2,300

買齋機就要$4,598--->但係缺貨加上佢欺騙我話舊客買有95折，最後係無，嬲嬲地決定去電器鋪買部齋機

行左幾間豐澤、鐳射、百老匯都話無貨，本來都唸住返屋企算啦

但行行下又路過一間豐澤把算問埋最後一間就歸家

點知一問竟然有貨 (我初時都係唸住店員亂答)，然後起起介紹部電話
我仲叫人地拎左部機出離先至講，點知真係拎左見實物出離

豐澤貴少少$4,798，但即時減$100再送屈臣氏$50 現金券 (仲有一張4G min SD CARD) 咁部電話實際係$4,648

本來都唔係咁想幫襯李生，但又有貨，我又忍唔到部電話壞壞地，所以...
因為3 & 豐澤都係李生，所以再問個sales買機加即時轉台個plan 會唔會有優惠--->本來只係想免個隧道費$12

點知呢個sales 真係好認真咁係咁行來行去幫我問店內3個個職員
真係呢個offer 聽到之後開心到吖，個plan 真係平到我自己都唔信
我之前其實都打過去3問，最優惠都係要用3 offer 比我公司個plan，都只係便個$12隧道費咁大把

現在個offer 係一年合約，$138 +12 隧道費 - $40 回贈，實際月費=110 (包半年無限data)，之後半年就得100m data，份合約其中一項條款列明合約期內月費必須為$138或以上 (即半月後可以轉用無限data plan，但依然可以經續享用$40回贈)
見佢咁吸引，我已經唔駛唸啦買電話 +即時轉台

點知簽簽下約，我叫個sales 記住起份合約列明首半年送無限data，之後原先負責3個sales 又走埋離，再幫我加多一個term 係送400mins 通話分鐘，我話我唔concern 個分鐘，我只係要上網，點知佢即時答我唔要分鐘送200m data 比我，仲要係送15個月

加加埋埋買呢部電話真係好抵！只係得1年合約，月費比起我現在個plan又平左一大截之餘，仲可以無限上網半年，之後可以upgrade 返個plan做無限上網。
加上我張HSBC 咭又有答賬現金回贈，我一次過付款可以換到$134，因為係現金回贈，所以部電話實際係$4,514，都仲未計我起來年電話費平左個D 錢落去，計計下部電話唔算十分貴

Pekkle眼鏡布

我都係老地方買...

2010年5月23日星期日

Hotchocspoon

每年復活節都好想收到復活蛋

今年雖然自己買了一隻，但係都想收到朋友送的復活蛋

1/4/10個日要返家聚，組長SMS 我Confirm

於是我回覆時順便加了一句如果有復活蛋就好啦

組長好快回覆我，我鐘意就買比你啦

返到去組長話買唔到復活蛋 (我即時扁嘴) 咁岩起log-on 見到Hotchocspoon就買左比我，佢話見到得平個D 復活蛋唔好食所以無買，其實我唔係想食朱古力而收復活蛋！但見到Hotchocspoon覺得好得意，朱古力上插住隻匙唔通好似珍寶珠咁食？但個口又無咁大喎！

返到屋企再仔細研究下，Hotchocspoon來自荷蘭朱古力品牌chocolate company，用來沖調食品。好似幾好玩咁！

how to prepare: put the spoon in 200cc full cream shortly boiled milk, stir and lick off the chocolate now and then...heavenly!
我買左一盒屋仔奶來製作，首先叮熱佢 (叮左分半鐘)，然後再搞搞下咁，可能太大塊朱古力，這杯製成品超甜，如果有機會再製作這個飲品我唸要用盒半至兩盒奶來沖調味道會好好多！

2010年5月21日星期五

Pekkle 有蓋水杯

呢隻杯由上年講話會出，一等就大半年啦

今日終於都帶左佢返屋企

只係$43但係估佢唔到個PACKING 靚到吖
但係返到屋企望到隻杯，見到佢印得唔靚，大家買GE 時候記得留意下

Pekkle 摺扇

今次終於都有機會POST 最新的產品啦

PEKKLE 今期都好紅，係咁出新野，真係好忙成日都要撲去旺角

你知啦，PEKKLE 好搶手嘛，有新貨一定要第一時間買啦...

PEKKLE 呢把摺紙真係好靚，同埋唔貴好似係$13

我自己就比較鐘意2003年出品的這把膠扇-->耐用嘛

2010年5月5日星期三

1st Blood donation

人一生裏必定會有不同的經歷、不同的體驗、不同的嘗試

今日我又踏出左我的第一次~~~就係捐血啦

其實好幾年前已經想捐血，奈何當時體重未達標

隨著年齡的增長，我身體上的脂肪亦累積了一定的數量

今日磅完重真係有點兒驚嚇.....唉，可能要開始減肥添

我公司每年的會安排紅十字會到公司，為自願的同事利用公司的時間去捐血

其實都見過紅十字會去過公司兩次

但係我自己一直都覺得捐血好恐怖

今次終於都有感動落實去做

但去捐之前都心大心細捐唔捐好呢?

因為見到起公司貼住個張捐血海報真係好驚，因為個捐血者拎住自己包血影相

我每次行過望到都有點而想嘔

好在最後都戰勝自己的心魔

其實捐血好簡單，只要填寫一份問卷，之後拮手指驗血色素，再之後就可以開始捐血

到拮手指時由於太緊張，工作人員叫我申請左手第四隻手指出離，我係完全聽唔到只將雙手申出 (佢想拮邊隻就邊隻啦)，動作好快都未來得及平伏緊張的心情就拮左落去隻手指到，怕痛的我當然即時大叫啦！

驗完血紅素就可以去捐血，由於公司地方淺窄，我坐低的時候係好清楚望同前面捐緊血個同事個袋血

我即時好驚咁同工作人員講，我唔要坐呢個位

個男工作人員好惡呀! 佢話呢度地方細個個位都會見到 (唯有死死地氣坐低)

原來坐低後張櫈會升高，咁都好D 起碼再見唔到包血嘛

但心情依然都係既緊張又驚慌，因為捐血係可以求助到一些有須要的人士，唯有祈禱求主拎走心裏恐懼，亦求告主希望係個姑娘幫我抽血 (因為先前個男工作人員好惡，增添了我恐懼)

主安排真的很好，牠安排了一個好好的姑娘為我拮針開始抽血

又問我問題分散我的注意力

雖然，姑娘每拮一針我都叫一次 (全場得我一個係咁咋

)

但故娘問我的問題都令到全場捐血中的同事大笑 (或者係笑我傻瓜哇)

加上我捐血時D 血又出唔到，姑娘同我講"老細比D 感情啦" (D 同事又大笑)

時間過得好走話咁快就OK，跟住到第二個姑娘幫我拎開D 針&我袋血

個姑娘係咁問我係咪唔舒服，我答無呀，佢話我塊面好青嘴唇又白

以為我捐完血唔舒服，佢見我塊面咁青要我坐耐D先至放我去飲野

之後左飲由紅十字會提供的飲品，同樣地個姑娘都係問我係咪唔舒服因為我塊面好青

飲完野GE 我當然想返埋自己個位工作啦，點知呢個姑娘都係話我塊面太青要我坐多陣

過左好耐先至放我走，出到去D 同事問我做乜鬼搞咁耐

佢地仲笑我係咪靚女人地想見多人幾面呢！